芝娃娃的啓示

某日在醫務所候診時，我聽到一段病人和姑娘有趣的談話，主題是「瘋癲的芝娃娃」。

病人：姑娘，我好慘呀！ 

姑娘：有幾慘？ 

病人：我最近養咗隻芝娃娃，好難攪！ 

姑娘：（瞪大眼睛）芝娃娃！好得意喎！

病人： 唉，做死我，佢好癲喪呀。（表情淒涼） 

姑娘：有幾癲？（懷疑地） 

病人：（開始如數家珍，指證隻芝娃娃，視牠如罪犯） 

姑娘：咁又真係幾癲喎？（風趣地）四處走，叫唔停；咬梳化、咬枱櫈、咬埋狗主人；唔聽話，無人（狗）性，大小二便隨處放。對不對？ 

病人：姑娘，你好犀利！ 

姑娘：當然！ 

病人：（將手機遞給姑娘）你睇下條片，你睇下佢？（為證明隻狗好離譜） 

姑娘：（好興奮）哈、哈、哈。真係好得意，我好鍾意佢。（又突然變臉）咁辛苦，我就唔養喇！ 

病人：係呀，由朝抹到晚，激死我！ 

姑娘：（怪責）做乜你唔教佢？ 

病人：（理直氣壯）我教咗喇！ 

姑娘：你有冇試過X X X呀？ 

病人：我試過所有方法，包括X X X 啦！慘到要比錢去上堂。

姑娘：上堂？ 

病人：帶隻狗去見醫生。

姑娘：都好喎，等專業醫生教下你隻狗啦。

病人：唉，姑娘大人，你錯喇。係醫生教我呢個狗主人。上堂係我，唔係佢（芝娃娃）。

曾教育許多行為偏差的小學生，他們常被父母，甚至老師認定是瘋癲的孩子，他們行為失控，擾亂課室，給父母及老師帶來許多麻煩。師長喜歡指證這些學生的不是，紀錄他們的罪行（缺點和大過），說自己甚麼方法都試過，表明自己已盡力，歸咎原因都是孩子本身的問題。嚴重的個案，是父母最終忍受不住，以暴易暴，或甚至採取完全放棄心態。

孩子是天主所賜，不要因他的與別不同而視之為異類，反之，我們作為父母或從事教育的人應檢討，自己是否需要更新，放下固有管教模式，願意開放自己去尋求援助， 接受別人的專業意見？ 

人是多元，孩子也是。孩子怎樣，反映父母怎樣；學生怎樣，反映老師怎樣教。沒有教不好的孩子，只有不願學習的父母和不會教的老師。

主耶穌是我們唯一的老師，讓我們恆常祈禱，為一切人成為一切，忘卻自己，從他人的角度和需要去著手，好使慈悲的面容彰顯人間。