【教友有問題】「教宗降福狀」係乜？

二嬸： 明仔老豆，隔離堂區陳太俾我睇佢之前領嗰張「教宗降福狀」（宗座遐福），賀佢哋兩公婆結婚廿周年呀！教宗嘅降福呀，你話陳太幾咁幸福呢？ 

二叔： 老婆，我梗記得我哋都係結婚廿周年喇。呢張降福狀好莊嚴，但同時都好簡單：其實領洗、晉鐸、結婚，甚至生日等等都申請得㗎。

二嬸： 有得申請咩？唔係聖堂派㗎咩？ 

二叔： 教友都可以响教宗賑濟所網站（https://www.elemosineria. va/）直接申請，亦有人會托機構或响意大利嘅朋友申請，不過就一定冇得淘喇！其實，我都幫你報咗名，參加堂區年尾嘅聖家節婚慶彌撒，不過冇話你知，想俾個驚喜你，到時我哋都會有張降福狀呢。

二嬸： 多謝老公！咁我哋上網揀番張靚啲嘅，唔知俾多少少錢會唔會有鑲金呢？ 

二叔： 降福狀唔係買賣，係比教友嘅祝福，同埋鼓勵大家去支持教宗嘅愛德工作。因為，降福狀扣除工本同郵費，會用喺「教宗賑濟所」嘅愛德工作嗰度，响疫情之下，佢地幫咗好多窮人渡過難關呀。我哋都要調番轉頭，求天主降福賑濟所同工！ 

二嬸： 咁一於補領番之前十幾年嗰啲，威威之餘仲可以捐多啲比賑濟所網站喇。

二叔： 錢可以照捐，但降福狀一張就夠喇，邊有咁多度牆嚟掛唧！ 

  
捐款支持公教報  http://kkp.org.hk/donation