【教友有問題】聖堂點解放馬槽？
期數
4007
刊登日期
2020.12.04
作者
阿公
主曆
主曆 2020 年 12 月 06 日 將臨期第二主日
阿女： 爸爸，點解聖堂又放馬槽呢？商場都有啦！入面有禮物， 仲播卡通片㖭。聖堂嗰個咩都冇，連小耶穌都冇！
爸爸： 聖堂嘅馬槽正宗好多，送禮物同好玩係想做生意啫，同耶穌降生救世冇關係㗎！聖堂馬槽有聖家、牧童、三賢士，最要緊有小耶穌⋯⋯齊人先至預報到呢個救恩故事㗎。
阿女： 都話唔見小耶穌咯！
爸爸： 堂區通常响子夜彌撒嗰晚，即係小耶穌出世喇，先至安放聖嬰落去。但同時有部份人認為，耶穌基督降生咗二千幾年，已經响我哋中間啦，不妨預先安放，而學校冇子夜彌撒，有時都會咁做。
阿女： 咁聖堂嘅馬槽布置又真係同老師講嘅聖經故事近啲。咁馬槽係邊個發明㗎？
爸爸： 相傳聖方濟响1223年嘅聖誕節安排上演真人馬槽，重現當年耶穌在白冷城誕生嘅情景。你家姐當年都响學校聖誕話劇扮過牧童啦。
阿女： 小耶穌咁得意，好想快啲見到佢呀！
爸爸： 我地一齊揭去《喜樂少年》第六頁，一齊DIY做個馬槽喇。
捐款支持公教報 http://kkp.org.hk/donation
