【教友有問題】點解會有大赦？

老公： 你個仔呀，竟然用Zoom上堂嗰陣打機！我要扔哂佢所有手機同遊戲機！ 

老婆： 老公，阿仔你都有份嘅，而且家陣唔可以咁樣教仔㗎喇！不如你學教會嚟個「大赦」，比機會阿仔改過喇？ 

老公： 大赦！我知！咪又係辦告解、領聖體，跟教宗意向祈禱，跟足「清單」就赦哂啲罪，未免太仁慈喇！ 

老婆： 天主先冇你咁公式化。做錯嘢如果唔本住愛德去改過，罪罰就好難得到天主寬赦，修補唔番同天主嘅關係。換轉係阿仔，如果佢覺得你唔愛佢，佢只會繼續講大話去避過俾你責罰呀！ 

老公： 我對事唔對人㗎，講到我好似唔愛佢咁！既然「全大赦」赦免全部暫罰，「有限大赦」就赦免部份暫罰（參《法典》993）。咁我「有限大赦」阿仔，淨係唔比佢玩手機喇。老婆，其實全大赦係咪為嗰啲唔辦告解嘅人而設嘅呢？ 

老婆：你諗多咗嘞！呢類大赦機會係比所有教友齊心去履行善工嘅。趁住今次「聖若瑟年」，你就唔好同阿仔計較，學吓大聖若瑟咁沉穩同默默包容喇！ 

老公： 咁我參考番主教公署通告（見第3版）嘅「聖若瑟年」全大赦條件， 步武大聖若瑟，去做個好爸爸，睇吓阿仔會唔會乖啲啦！ 

  
捐款支持公教報  http://kkp.org.hk/donation