【教友有問題】彌撒咩時候要鞠躬？

爸爸： 阿仔，你為乜全程網上彌撒都鞠躬呢？你鞠到我同爺爺眼都花埋喇！ 

阿仔： 爸爸爸爸，你上次咪教落：輔祭幾時跪，我哋就幾時跪咩？而家網上彌撒，個鏡頭又成日影住祭台， 唔鞠躬好似冇嘢做咁！ 

爺爺： 大把教友見親神父同聖像都鞠躬啦，人哋鞠我唔鞠，唔好意思吖嘛！ 

爸爸： 雖然禮多神不怪，但係主禮、輔禮同教友鞠躬嘅時機好唔同㗎。鞠躬禮係用嚟表達敬意，所以當信經唸到「祂因聖神由童貞瑪利亞取得肉軀，而成為人」，我哋就要俯身深鞠躬（參《羅馬彌撒經書總論》），去感謝天主呢份「道成肉身」嘅奧蹟。 習慣上，好多教友唸天主聖三，同埋耶穌、聖母、要敬禮嘅聖人嗰陣，例如唸光榮頌，都會淺鞠躬；而領聖體同聖血之前都係。

爺爺： 鞠躬好！教會體諒老人家，我哋响祝聖聖體聖血嗰時跪唔到，可以深鞠躬補番數㗎。

阿仔： 彌撒禮成，我哋感謝天主都鞠躬㗎啦，爸爸你數漏咗啦！ 

爸爸： 阿仔，呢個都唔係規定嚟㗎 ！咦，我見你望完彌撒主恩滿滿，精力充沛咁，不如你扶爺爺去梳化坐低，佢係咁鞠躬都搞咗成個鐘，好嘞，你幫爺爺揼吓腳同腰啦！ 

  
捐款支持公教報  http://kkp.org.hk/donation