【教友有問題】輔祭要做咩㗎？

阿仔： 好嘢！領咗堅振可以入輔祭會喇。

阿女： 我又去！ 

阿哥： 雖然我哋堂區都有女仔入輔祭會，但輔祭職務係用嚟培育男仔做神父㗎，阿妹你又成日姿姿整整，都係唔好跟我一齊入喇。

阿女： 阿哥，呢個年代男女平等呀！我哋唔係姿整，係尊重儀容，至少白袍下面唔會係對污糟臭波鞋喇！ 

爸爸： 唔好拗，呢個唔係平唔平等問題，信仰係睇合唔合適。冇錯，輔祭同培育聖召有關，不過女士一直响輔祭同其他崗位上面，對教會貢獻好大，而教宗最近已經喺制度上，正式俾女教友做輔祭嘞。

阿仔： 彌撒進台嗰陣，輔祭員要高舉十字架，又要搖吊爐，阿妹你夠力咩？ 

阿女： 輔祭嘅職責係服務祭台，唔係要得鋪牛力，要識同主禮溝通，仲要識執生，亦要預備祭器。當然，要早好多去聖堂準備同靈修，阿哥你擔心吓你自己起唔起到身先喇！ 

爸爸： 當年我做輔祭嗰陣，神父鼓勵我去回應聖召，但我話自己唔夠信德，第日留番俾個仔。阿仔，你做個好榜樣俾阿妹，帶住佢去服務祭台喇！ 

阿仔： 爸爸！等我過到培育先講喇！阿妹你剪定前面撮頭髮，咪到時喺祭台度成日撥頭髮就得嘞！ 

  
捐款支持公教報  http://kkp.org.hk/donation