【教友有問題】可唔可以遙距辦告解？
期數
4019
刊登日期
2021.02.26
作者
阿公
主曆
主曆 2021 年 02 月 28 日 四旬期第二主日
教友甲：新型冠狀病毒疫情整整一年未停過，我可唔可以打電話或者 Whatsapp 俾神父辦告解呀？
教友乙：而家教友都可以搵神父辦告解，堂區會按情況去安排㗎。响香港，正常情況下，修和聖事即係辦告解，要响聖堂、修和室或告解亭進行。因為响呢件聖事入面，神父要同教友面對面傾呢。
教友甲：因我唔知我有冇中招，萬一傳染俾神父就唔好喇。
教友乙：告解內容會涉及私隱， 如果電話俾人竊聽，或者 Whatsapp 俾人偷用，咁會損害到件聖事㗎。外國有啲教區都出咗指示唔俾上網辦告解喇。
教友甲：收到！四旬期都可以辦到修和聖事，真係好，咁我呢一年就安樂哂囉。
教友乙：教會規定，「凡到達懂事年齡的信友，皆有責任至少一年一次，誠實地告明經省察出來的、自己的重罪」（教理1457），講緊嘅係每年至少一次，如果犯咗「大罪」，做咗啲明知故犯嘅嘢，都要响領聖體前辦告解㗎！
教友甲：好！等我打電話去堂區，同神父約番個時間先。
捐款支持公教報 http://kkp.org.hk/donation
