【耆年Easy活】打工難，退休更難（中）〔作者︰慕容蓮〕

話說 Marianne 退休半年後，終於解決了人生兩慘，應該可以好好享受退休生活，怎知她轉頭又向我申訴！ 

「係阿仔！佢個老婆揾到份工，要返工，叫我幫佢凑仔！」

「你個新抱唔係話嫁人之後唔做嘢，要相夫教子咩！」

「講就無敵，留嘢喺屋企唔悶咩，邊似得返工咁開心！」終於知道Marianne從未放假的原因！「而且我邊識凑，我自己個仔都係阿媽凑！」

「咁你新抱個阿媽呢？」

「佢話佢阿媽好忙，又要跳舞，又要練瑜伽，總之星期一至五排滿！佢仲話又唔敢請家務助理，怕個仔咁細如果俾人虐待都唔識投訴！」

「吓，咁咪仲辛苦過返工！」

「最嬲係阿仔話以前婆婆凑佢都冇工人！」

我們上一代的女性真是特別厲害，就以 Marianne 的媽媽來看，小學未畢業，老公早逝，但就有本事靠幫茶樓洗碗及幫人凑仔， 把自己的兩個仔一個女養育成才，個個大學畢業，還把孫兒帶得又靚仔又叻仔。相信叫她去凑曾孫她老人家一定義無反顧，但已經80幾歲了，曾孫要來玩玩可以，要日日照顧，真的會要了她的老命！ 

我自己沒有子孫，不知怎樣開導她，但也可以想像由一個職場小白兔變身成凑孫婆婆兼女傭的難處。既然電話到，那怎樣也要給她一些意見，於是我趁著可以四人飯局之便，約了她及 Maria 出來幫她散散心！（五） 

• 慕容蓮，剛退休人士。

  
捐款支持公教報  http://kkp.org.hk/donation