【教友有問題】釋奧期要做乜？

新教友： 陳生陳太你哋好有心呀，見我冇人陪，就陪我一齊參加彌撒，又介紹埋個好好用嘅手機靈修程式俾我㖭！ 

陳太： 釋奧期嘛，我哋梗係要主動關心新教友嘅。

陳生： 老婆，我見堂區慕道團都有釋奧期聚會喇，我哋呢啲小薯仔冇嘢做到喎。

陳太： 當年我新領洗，如果唔係隔籬嗰位嘅教友見我跟唔上禮儀書，幫我之餘，仲介紹我入基基團，我都識唔到老公你喇！每個教友都有責任去幫新教友堅定信仰㗎。復活主日起至聖神降臨節結束係釋奧期，有啲堂區嘅釋奧期培育甚至更長㖭。

新教友： 咁多善會眼都花，我淨係想聽講座學吓祈禱方法先呢。

陳生： 祈禱都需要靠讀聖經同團體生活去紮穩根基，你不妨問傳道員有乜好介紹，新教友同一個團體聚埋，仲可以一齊慶祝領洗周年㖭！ 

陳太： 哦！你都冇同我慶祝領洗周年，自己做唔到仲去教人 ！ 

陳生： 既然今日咁開心識到新朋友，我哋就一齊望完彌撒，一齊食晏，順便同老婆你慶祝喇！ 

  
捐款支持公教報  http://kkp.org.hk/donation