【耆年Easy活】情何以堪（中）〔作者︰慕容蓮〕

話說上星期我同退休人士兼凑孫嫲嫲 Marianne 去蘭桂坊喫了一個下午茶，竟然吃出一個愁緒來，因為 Marianne 撞到明月，即是我們的中學同學，的丈夫跟一個美少女扭抱在一起！我倆真的不知如何是好，於是我們又找上了職場小魔女 Maria。

只見 Maria 一邊望著明月丈夫出軌的圖像，一邊剎有介事的說：「佢老公真係仲好型，又有錢又型，我係佢都出去玩下！」

我跟 Marianne 互望一下，眼神表示「並不同意」！

「理想係一回事，事實係另一回事！佢出軌唔代表佢唔愛明月，係孔雀開屏，你明唔明！」

「咁話唔話俾明月知？」Marianne 最關心這個問題。

「好難講！因為有幾個可能性！或者佢唔知，於是可以繼續幸福快樂咁去做佢嘅闊太，你睇佢平日打扮，一個手袋就係我一個月人工！佢完全冇打過工，冇為過冇錢而煩惱，根本就係冇煩惱，咁你叫佢點同佢老公攤牌！」

「唔通眼白白睇住佢俾佢老公恰！」

「咁佢老公又未必恰佢喎！或者佢老公內咎，良心過唔去，會對佢仲好尐都唔定呢！」

「唔通由得佢俾佢老公咁樣呃落去咩！」

「未必喎，可能佢知呢！」

「知都唔出聲！」我失控大叫！ 

「知未必可以出聲！或者佢都煩緊唔知點做好呢！」

「有咩點做呀，離婚囉，分佢一半身家都好！」

「人地呢尐大家族，咁易俾你分佢一半身家咩，到時撕爛咗塊面，佢老公仲明目張膽出去玩，咪仲衰！」

「基本生活費點都有嘅，俾佢咁呃就勢係假！」

「人地大家族嚟，果種生活同我地唔同，佢自己走咗，咁兩個仔一個女點呀，如果老公再娶又生幾件，咪同佢尐仔女爭身家！」

「咁點呀！」 

「唔好講囉！」Maria 結論。

「我都係想約明月出嚟打聽下！」Marianne 說。（八） 

• 慕容蓮，剛退休人士。

  
捐款支持公教報  http://kkp.org.hk/donation