【教友有問題】點解會有「合一祈禱週」？

阿仔： 阿媽，既然你咁喜歡堂區搞嘅泰澤合一祈禱聚會，不如你陪埋我去今年嘅「基督徒合一祈禱週」聚會喇？充滿友愛㗎！ 

阿媽： 平時咪有合一聚會囉，點解會有個祈禱週㗎？係咪淨係俾主教同領袖參加㗎？ 

阿仔： 基督徒合一祈禱週係屬於大家㗎。1908年， 美國神父威特遜（Paul Wattson）發起喺1月18至25日 慶祝呢個祈禱週，為基督徒嘅共融合一祈禱，香港喺半個世紀前開始舉行聚會嘞。今年因為疫情先改喺5月舉行。阿媽你應承同我去喇！ 

阿媽： 咁緊張做乜？唔通有特別嘉賓？ 

阿仔： 阿媽你真係醒目，我想帶你見我女朋友呀，佢會跟基督教 團體一齊參加！ 

阿媽： 你個心都飛咗去女朋友度喇 ！如果第日你跟佢過咗基督教，記得都幫阿媽祈禱呀！ 

阿仔： 合一交談係互相認識、建立友誼同埋分享信仰，唔係迫對方去歸邊㗎。阿媽你諗多咗喇，我女朋友都想我繼續陪你返天主教聖堂㗎。

阿媽： 阿仔，你清楚自己嘅信仰，人哋先會同你交談到。我一於陪你去聚會，等你女朋友見到你阿媽我之後，對天主教徒有個好印象！ 

  
捐款支持公教報  http://kkp.org.hk/donation