【耆年Easy活】忘了，忘不了（中）〔作者︰慕容蓮〕

話說 Marianne 的前秘書被老闆責斥她無故重覆傳遞電郵，前秘書又投訴她的丈夫不停打電話查詢她的行踪，而當她們晚飯後，她的丈夫又打電話給 Marianne 查問前秘書的去向，令 Marianne 也覺得事有蹺蹊。

「唔好意思，我唔想打搞，不過你知我老婆唔想我再打電話煩佢，但係我真係要知佢幾時走，等我落樓下接佢呀！」

「咁甜蜜，仲要落樓下接佢！自己唔識返上樓咩！」

「真係唔識呀！自從搬咗嚟呢度之後，佢試過返咗舊居三次，你知我退咗休喇，宿舍交返出嚟，好彩尐人認得佢，我咪開車去接佢囉！ 

「又試過一次，佢喺樓下行嚟行去都唔識返上屋企，好彩我落街買嘢見到佢。」

「咁佢唔會打電話叫你去接佢咩！」

「肯就唔會喺樓下行嚟行去都唔識返上嚟喇！」

「有尐唔妥喎，睇下醫生好喎！」

「邊肯吖！」

「好，我幫你安排！」

於是那個晚上，Marianne 打電話給前秘書，告訴她她的丈夫又來電追問前秘書的去向，並懷疑她的丈夫有失智症的可能。

「咁真係要帶老公去睇醫生喇！」

「未必肯喎。」Marianne 說。

「點到佢唔肯！」

前秘書二話不說，便請 Marianne 代她 book 了一個老人科醫生，好讓她帶丈夫去求診。（十一）

• 慕容蓮，剛退休人士。

  
捐款支持公教報  http://kkp.org.hk/donation